Gerald Knaus, kryetar i Iniciativës Evropiane për Stabilitet (ESI), ka thënë se disa shtete po përpiqen ta bllokojnë votimin për anëtarësimin e Kosovës në Këshillin e Evropës, që pritet të bëhet në maj.
Kryetari i Iniciativës Evropiane për Stabilitet (ESI), Gerald Knaus, ka deklaruar se Gjermania dhe Franca janë duke u përpjekur të bllokojnë votimin për anëtarësimin e Kosovës në Këshillin e Evropës.
Knaus tha se këto dy shtete po e injorojnë rekomandimin e Asamblesë Parlamentare në muajin prill.
“Megjithatë, në këtë moment disa qeveri anëtare të Këshillit të Evropës, përfshirë Gjermaninë dhe Francën, po përgatiten të bllokojnë votimin për pranimin e Kosovës në maj, duke injoruar rekomandimin e fortë të Asamblesë së saj parlamentare në prill”, ka shkruar ai në platformën X.
Sipas tij, kjo është pasojë e fushatës së presidentit të Serbisë, Aleksandër Vuçiq, i cili ka kërkuar nga presidenti i Francës, Emmanuel Macron që ta pengojë votimin.
“Në përvjetorin e 75-të, Këshilli i Evropës është i ndarë në një çështje kyçe: a kanë vlerë vlerësimet ligjore dhe votat në Asamblenë Parlamentare? A është anëtarësimi për merita apo thjesht vetëm politik?” ka shkruar tutje.
Ndërkohë, Kosovës për t’u anëtarësuar në KiE iu është përmendur kushti i Asociacionit.
