Kolonët izraelitë u vunë zjarrin shtëpive dhe automjeteve të palestinezëve në një vendbanim në Bregun Perëndimor të pushtuar, raporton Anadolu.
Sipas dëshmitarëve okularë, dhjetëra kolonë hebrenj sulmuan vendbanimin Turmusaya, në veri të qytetit Ramallah.
Kolonët agresivë u vunë flakën disa shtëpive dhe automjeteve në vendbanimin Turmusaya. Ka pasur incidente mes banorëve të vendbanimit dhe kolonëve të cilët kanë reaguar për këtë.
Në lajmet e agjencisë zyrtare palestineze WAFA, thuhet se kolonët hebrenj sulmuan vendbanimin Turmusaya nën mbrojtjen e policisë izraelite.
Në lajme thuhet se disa qytetarë palestinezë në Turmusaya kanë mbetur të bllokuar në shtëpitë e tyre.
Grupet palestineze dënuan sulmet e kolonëve hebrenj
Nga ana tjetër, grupet palestineze në Rripin e Gazës dënuan sulmet e kolonëve hebrenj në Bregun Perëndimor.
Në deklaratat e bëra nga Hamasi, Lëvizja Xhihad Islamik, Fronti Popullor për Çlirimin e Palestinës dhe Fronti Popullor Demokratik për Çlirimin e Palestinës, theksohet se palestinezët do të vazhdojnë të mbrojnë jetën dhe tokat e tyre.
Shtatë palestinezë, mes tyre dy fëmijë, u vranë dhe mbi 60 palestinezë u plagosën në sulmet e kryera nga ushtria izraelite në qytetin Jenin, që ndodhet në veri të Bregut Perëndimor të pushtuar, të hënën, duke përdorur një helikopter të tipit “Apache”. Në përleshje u plagosën edhe 7 ushtarë izraelitë.
