Koreja e Jugut ka regjistruar temperaturën më të lartë që nga fillimi i matjeve zyrtare të motit në vitin 1904, ndërsa autoritetet u kanë bërë thirrje qytetarëve të ndërpresin menjëherë të gjitha aktivitetet në ambiente të hapura.
Sipas Administratës Meteorologjike të Koresë (KMA), qyteti juglindor i Yangsan shënoi të dielën një temperaturë rekord prej 42.5 gradë Celsius, më e larta e regjistruar ndonjëherë në vend.
Yangsan është goditur nga një valë e fortë të nxehti, ku temperaturat kanë kaluar 40 gradë Celsius për pesë ditë radhazi. Edhe qytete të tjera, si Daegu dhe Busan, po përballen me temperatura që arrijnë në fundin e 30 gradëve.
Për t’i shpëtuar vapës ekstreme, shumë qytetarë janë strehuar në qendra tregtare, kafene dhe ambiente të tjera me ajër të kondicionuar.
Autoritetet kanë shpallur alarm emergjent për valën e të nxehtit në më shumë se 20 zona të vendit. Ky nivel paralajmërimi, i prezantuar këtë vit, aktivizohet kur temperatura e ndjerë parashikohet të arrijë 38 gradë Celsius ose temperatura reale 39 gradë Celsius.
Zyrtarët kanë paralajmëruar gjithashtu se qëndrimi në ambiente të mbyllura pa ajër të kondicionuar mund të jetë i rrezikshëm dhe u kanë bërë thirrje qytetarëve të shmangin ekspozimin në diell gjatë orëve më të nxehta të ditës. /mesazhi
