Ministri i Jashtëm danez, Lars Lokke Rasmussen, kërkoi falje për sulmet ndaj Kuranit që u kryen para ambasadave të disa vendeve islame në Kopenhagë dhe shprehu keqardhjen e tij, transmeton Anadolu.
Sipas një komunikate me shkrim nga Ministria e Jashtme e Algjerisë, ministri i Jashtëm danez, Rasmussen, ka zhvilluar një bisedë telefonike me homologun e tij algjerian, Ahmed Attaf.
Gjatë bisedës, ministri danez shprehu keqardhjen dhe kërkoi falje për valën e krimeve kundër djegies së Kuranit para ambasadave të disa vendeve islame, përfshirë Ambasadën e Algjerisë në Kopenhagë.
Duke theksuar se këto veprime janë të papranueshme, ministri Rasmussen theksoi se sulmet në fjalë shkelin plotësisht traditën e tolerancës së shoqërisë daneze.
Rasmussen informoi gjithashtu homologun e tij algjerian se qeveria e tij është në përfundim e sipër të punës për projektligjin që synon t’i japë fund këtyre praktikave, duke shtuar se ai do ta paraqesë këtë projektligj në parlament.
Nga ana tjetër, Attaf dhe Rasmussen shkëmbyen mendime rreth përgatitjeve për sesionin e 20-të të Konferencës së Përbashkët Ministrore të Vendeve të Afrikës dhe Evropës Veriore që do të mbahet në Algjeri në datat 16-18 tetor 2023.
Provokimet kundër Kuranit të Shenjtë në Suedi dhe Danimarkë
Teksa sulmet kundër Kuranit janë intensifikuar kohët e fundit në Suedi dhe Danimarkë, lejimi i këtyre provokimeve është pritur me reagime.
Një grup islamofobik dhe ultra-nacionalist në Danimarkë kishte filluar sulmet ndaj flamurit turk dhe Kuranit përpara ambasadës turke në Kopenhagë që nga prilli.
Anëtarët e grupit, të cilët bërtisnin parulla anti-islamike dhe fyese ndaj Islamit, kohët e fundit dogjën Kuranin para disa ambasadave.
Gjithashtu, grupi i vuri zjarrin Kuranit para një xhamie në Kopenhagë më 28 korrik.
Kur personat në fjalë i kryenin provokimet e tyre jashtë Kopenhagës, ata hasën në reagimin e disa muslimanëve atje.
Shumë vende, veçanërisht Turqia, reaguan për faktin se këto veprime u kryen nën mbrojtjen e policisë dhe duke marrë leje nga autoritetet.
