Kryeministri në detyrë i Sllovakisë, Eduard Heger, ka njoftuar të dielën për kërkesën e tij që të lirohet nga detyra, raportoi Reuters.
Kërkesa e tij ndaj presidentes Zuzqana Caputova u bë pasi dorëheqjet e ministrave të qeverisë së drejtuar nga Heger e dobësuan kabinetin e tij, i cili po shërben përkohësisht deri në zgjedhjet që do të mbahen në shtator.
Hegeri është përballur me thirrjet e opozitës për t’i hapur rrugë një administrate teknokrate për të udhëhequr vendin deri në zgjedhjet e parakohshme që do të zhvillohen në shtator.
Sondazhet tregojnë se publiku favorizon partinë më të madhe opozitare, e cila drejtohet nga ish-kryeministri Robert Fico.
Hegeri ka thënë të dielën se nuk dëshiron që kriza politike të zvarritet.
“Vendosa t’i kërkoj presidentit të heqë autoritetin tim dhe t’i lë presidentit hapësirë për t’u përpjekur me një qeveri teknokrate për ta udhëhequr Sllovakinë në mënyrë të qëndrueshme dhe paqësore drejt zgjedhjeve parlamentare demokratike”, ka thënë ai në një konferencë shtypi.
Ende nuk dihet nëse presidentja Caputova do ta emërojë këtë të diel një kryeministër të ri në detyrë. /koha
