Kryeministri i Kosovës, Albin Kurti, ka pritur në takim të martën zëvendësasistentin për çështjet politike dhe politika të sigurisë të Sekretarit të Përgjithshëm të NATO-s, Javier Colomina, me të cilin kanë diskutuar për mbështetjen e NATO-s për Kosovën dhe kontributin në ruajtjen e paqes dhe sigurisë në Ballkanin Perëndimor.
Në njoftimin e lëshuar nga Zyra e Kryeministrit, thuhet se Kurti e ka njoftuar Colominan për situatën e sigurisë në vend, për synimet e institucioneve të vendit për anëtarësim në Bashkimin Evropian dhe NATO si dhe vendosmërinë e Qeverisë së Kosovës për të luftuar korrupsionin dhe krimin e organizuar në tërë territorin e Kosovës.
“Kryeministri Kurti gjithashtu theksoi përkushtimin e qeverisë për zhvillimin e kapaciteteve të mbrojtjes dhe sigurisë si dhe vullnetin për të kontribuar për paqen dhe sigurinë në botë, krahë NATO-s dhe partnerëve. Në takimin me z. Colomina dhe ekipin e tij, kryeministri Albin Kurti u shoqërua nga Koloneli i Forcës së Sigurisë së Kosovës, Ejup Maqedonci”, thuhet më tej në njoftim.
