Zyrtarët izraelitë vlerësojnë se mbi 1.200 izraelitë janë vrarë në sulmet e Hamasit në qytete pranë Rripit të Gazës, transmeton Anadolu.
Gazeta ‘Yedioth Ahronoth’ raportoi se zyrtarët në Tel Aviv po ashtu besojnë se mbi 200 izraelitë u kapën rob nga Hamasi në Gaza.
Ministria e Shëndetësisë e Izraelit ende nuk e ka konfirmuar numrin e ri.
Gazeta izraelite ‘Haaretz’ më herët raportoi se sulmi i Hamasit ka vrarë mbi 1 mijë izraelitë.
Grupi palestinez Hamas nisi një sulm të befasishëm të shtunën, me luftëtarët që depërtuan në qytetet izraelite pranë Gazës në mes të zjarrit të rëndë me raketa.
Izraeli u kundërpërgjigj me një seri sulmet ajrore në Rripin e Gazës dhe vendosi një bllokadë të plotë në territorin ku banojnë afër 2.2 milionë njerëz.
Sipas Ministrisë së Shëndetësisë në Gaza, të paktën 830 palestinezë u vranë dhe 4.250 të tjerë u plagosën në bombardimet izraelite të Rripit të Gazës.
Kryeministri izraelit, Benjamin Netanyahu, është zotuar se do të përdorë të gjithë forcën e Izraelit për të shkatërruar aftësitë e Hamasit dhe për t’u “hakmarrë për këtë ditë të zezë”.
