Qeveria e Meksikës ka vendosur tarifa doganore deri në 50 për qind ndaj produkteve të importuara nga Kina, një vendim që është mirëpritur nga prodhuesit vendas, veçanërisht industria e këpucëve në qytetin Leon, e cila prej vitesh përballet me konkurrencën e produkteve kineze më të lira.
Autoritetet meksikane deklarojnë se masat synojnë mbrojtjen e rreth 350 mijë vendeve të punës dhe forcimin e ekonomisë kombëtare. Megjithatë, analistët vlerësojnë se vendimi mund të jetë ndikuar edhe nga presioni i Shteteve të Bashkuara, të cilat kanë frikë se Meksika po shërben si një “derë e pasme” për hyrjen e mallrave kineze në Zonën e Tregtisë së Lirë të Amerikës së Veriut.
Kina ka kritikuar ashpër vendimin, duke paralajmëruar se tarifat do të dëmtojnë të gjitha palët. Ndërkohë, konsumatorët në Meksikë pritet të përballen me rritje çmimesh për produkte të njohura kineze, përfshirë automjetet elektrike.
Nga Mexico City raporton John Holman për Al Jazeera. /mesazhi
