Ministri izraelit ekstremist i Sigurisë Kombëtare, Itamar Ben-Gvir, kërkoi sot shpërbërjen e Kabinetit të Luftës të Izraelit nëse zvogëlohet intensiteti i luftës në Gaza, transmeton Anadolu.
Kabineti izraelit i luftës u krijua më 11 tetor për të drejtuar luftën në Gaza dhe përbëhet nga kryeministri Benjamin Netanyahu, ministri i Mbrojtjes Yoav Gallant dhe Benny Gantz, i cili është kreu i Partisë së Unitetit Kombëtar në opozitë, krahas dy vëzhguesve – ministrit të Çështjeve Strategjike Ron Dermer dhe ministrit pa portofol Gadi Eisenkot.
“Ideja e reduktimit të aktivitetit në Gaza është një dështim i menaxhimit të luftës nga kabineti i vogël (i luftës). Duhet të shpërbëhet menjëherë”, tha Ben-Gvir në një deklaratë.
“Ka ardhur koha për të rivendosur frenat në kabinetin më të gjerë (të sigurisë)”, shtoi ai.
“Nëse dikush ka ndërmend, Zoti na ruajt, të ndalojë IDF-në (ushtrinë izraelite) përpara se Hamasi të mposhtet dhe të kthehen të gjithë pengjet, ai duhet të marrë parasysh se Otzma Yehudit nuk do të jetë me të”, tha Ben-Gvir gjithashtu duke iu referuar anëtarësimit të partisë së tij në koalicionin qeverisës.
Të hënën, media izraelite raportoi se Izraeli po negocion me ndërmjetësit – Egjiptin dhe Katarin – në një përpjekje për të arritur një marrëveshje të re shkëmbimi të të burgosurve me Hamasin.
