Ministri i Financave, Punës dhe Transfereve Hekuran Murati ka mbajtur sot një konferencë për media, ku ka bërë të ditur se mësimi do të fillojë nesër më 1 shtator.
Sa i përket çështjes së grevës, ai ka thënë se ata të cilët kanë qenë dhe janë në grevë do të pezullohen nga paga.
Duhet theksuar se pak më parë, Ministria e Arsimit, Shkencës dhe Teknologjisë ka njoftuar se mësimi fillon nesër në të gjitha nivelet e ulëta dhe të larta shkollore në Kosovë.
Po ashtu u theksua se Sindikata e Bashkuar e Arsimit Shkencës dhe Kulturës nuk ka të drejtë të mbyllë shkollat dhe se presioni i tyre është i dënueshëm.
Por ndryshe u deklarua sot kryetari i SBASHK-ut, Rrahman Jashari, i cili ka thënë se greva vazhdon dhe ka kërkuar nga prindërit që të mos i dërgojnë fëmijët në shkollë, pasi mësimdhënësit janë në grevë.
“Nxënësit s’kanë çka të vijnë në shkollë pasi mësimdhënësit janë në grevë të cilën nuk e deshën por s’patën zgjidhje tjetër. Grevën nuk po e bëjnë individët, është vullnet i shprehur nga punëtorët e arsimit, por edhe punëtorëve të tjerë”, tha Jasharaj.
