Shërbimi Korrektues i Kosovës ka bërë të ditur se Drejtori i Drejtoratit për Trajtimin e të Burgosurve dhe të Miturve, Ali Gashi, ka dhënë dorëheqje.
Dorëheqja e Gashit vjen pas rastit të 11-vjeçares, e cila dyshohet se u dhunua nga pesë persona në Prishtinë, shkruan lajmi.net.
Sipas SHKK-së, dorëheqja e Gashit vjen si akt moral, pasi që njëri nga të dyshuarit për dhunim ka qenë në mbajtje të dënimit në institucione korrektuese për disa vepra penale.
Dorëheqja është miratuar nga Shërbimi Korrektues i Kosovës.
“Pas rastit të dhunimit të 11 vjeçares, si akt moral jep dorëheqje Drejtori i Drejtoratit për Trajtimin e të Burgosurve dhe të Miturve, z. Ali Gashi. Dorëheqja ka ardhur si akt moral i z. Gashi, pasi që njëri nga të dyshuarit për dhunim ka qenë në mbajtje të dënimit në institucione korrektuese për disa vepra penale. Dorëheqja është miratuar nga Shërbimi Korrektues i Kosovës”, thuhet në njoftim.
Kujtojmë se dje për këtë rast ka dhënë dorëheqje edhe Drejtori i Përgjithshëm i Policisë së Kosovës, Samedin Meheti.
