Tensionet në Ngushticën e Hormuzit janë rritur sërish, pasi Irani njoftoi të shtunën rikthimin e kufizimeve dhe mbylljen efektive të kësaj rruge strategjike detare.
Sipas raportimeve, të paktën dy anije tregtare janë qëlluar me armë zjarri teksa po përpiqeshin të kalonin ngushticën. Operacionet Detare të Mbretërisë së Bashkuar (UKMTO) bëjnë të ditur se dy mjete të Gardës Revolucionare Iraniane kanë hapur zjarr ndaj një cisterne dhe një anijeje tjetër, rreth 37 kilometra në verilindje të Omanit, pa paralajmërim.
Një nga anijet e sulmuara raportohet të ketë qenë një cisternë e madhe me flamur indian, e ngarkuar me rreth dy milionë fuçi naftë bruto nga Iraku.
Ngjarja vjen vetëm një ditë pasi ish-presidenti amerikan Donald Trump deklaroi se kalimi nëpër Ngushticën e Hormuzit ishte rihapur plotësisht për transportin tregtar.
Sipas mediave ndërkombëtare, rreth 20 anije që prisnin të kalonin janë detyruar të kthehen drejt Omanit, ndërsa forcat detare iraniane kanë dërguar mesazhe radio duke shpallur ndalimin e lundrimit në zonë.
Megjithatë, disa lëvizje janë regjistruar gjatë së shtunës. Agjencia Reuters raportoi se tetë cisterna arritën të kalonin ngushticën, duke shënuar qarkullimin e parë të rëndësishëm që nga shpërthimi i konfliktit mes Shteteve të Bashkuara, Izraelit dhe Iranit më 28 shkurt.
Të dhënat nga shërbimet e gjurmimit të anijeve tregojnë gjithashtu se disa cisterna kishin nisur të largoheshin nga Gjiri Arabik para shpalljes së kufizimeve të reja nga Irani. /mesazhi
