Kundërofensiva e fundit e Ukrainës nuk do të ndryshojë planet e Rusisë, ka thënë Vladimir Putin në komentet e tij të para publike për këtë çështje, shkruan BBC.
Në një kundërsulm të shpejtë, forcat ukrainase thonë se rimorën mbi 8 mijë km katrorë në gjashtë ditë në rajonin verilindor të Kharkivit.
Por Putini ka thënë se nuk ishte me nxitim dhe ofensiva në rajonin e Donbasit të Ukrainës mbetet në rrugën e duhur.
Ai gjithashtu vuri në dukje se Rusia nuk ka vendosur forcat e saj të plota deri më tani.
“Operacioni ynë sulmues në Donbas nuk po ndalet. Ata po ecin përpara – jo me një ritëm shumë të shpejtë – por gradualisht po marrin gjithnjë e më shumë territor”, ka thënë ai pas një samiti në Uzbekistan.
Rajoni industrial i Donbasit në Ukrainën lindore është fokusi i pushtimit rus, për të cilin Putini pretendon në mënyrë të rreme se është i nevojshëm për të shpëtuar rusishtfolësit nga gjenocidi.
Pjesë të Donbasit janë pushtuar nga separatistët e mbështetur nga Rusia që nga viti 2014. Rajoni i Kharkivit, ku u nis kundërsulmi i fundit i Ukrainës, nuk është pjesë e Donbasit.
Në komentet e së premtes, Putini kërcënoi me një përgjigje “më serioze” nëse sulmet ukrainase vazhdojnë.
“Ju kujtoj se ushtria ruse nuk po lufton në tërësi… Vetëm ushtria e rregullt po lufton”, ka thënë ai.
Deri më tani, Rusia nuk i ka shpallur zyrtarisht luftë Ukrainës dhe vetëm i referohet pushtimit të saj si një “operacion special ushtarak”.
Por pas humbjeve të fundit të Rusisë, disa komentues pro-Kremlinit kanë bërë thirrje për mobilizimin e më shumë forcave. Një video e zbuluar së fundmi, tregon se Rusia përmes kompanive private po përpiqet të rekrutojë burra për të luftuar. /koha
