Qeveria e Jemenit tha se 150 civilë janë vrarë dhe më shumë se 200 të tjerë janë plagosur nga sulmi i Huthive në provincat Taiz, Al-Hudaidah dhe Marib që nga 3 shtatori, transmeton Anadolu.
Shifrat u njoftuan në një deklaratë të Ministrisë së të Drejtave të Njeriut, e publikuar të dielën vonë nga agjencia zyrtare jemenase e lajmeve Saba. Ministria dënoi ashpër “përshkallëzimin ushtarak dhe shkeljet e gjera të kryera nga grupi Huthi” që nga 3 shtatori në disa zona të Taizit, Al-Hudaidah dhe Maribit.
Sipas saj, përshkallëzimi përfshiu raketa balistike dhe sulme me dronë, bombardime me lloje të ndryshme armësh, si dhe sulme ndaj zonave të banuara, kampeve të të zhvendosurve dhe kolonave të civilëve që largoheshin nga zonat e luftimeve.
Ministria tha se 150 civilë u vranë dhe më shumë se 200 të tjerë u plagosën nga sulmi i Huthive ndërsa rreth 85 mijë persona u zhvendosën. Ajo shtoi se prona u shkatërruan dhe familjet u privuan nga shtëpitë, mjetet e jetesës dhe nevojat bazë.
Rreth 2.000 persona kishin mbërritur në Xhibuti për shkak të përshkallëzimit, tha ministria, duke reflektuar përhapjen e ndikimit humanitar përtej Jemenit.
Ajo e bëri grupin Huthi përgjegjës për shkeljet dhe u bëri thirrje komunitetit ndërkombëtar, OKB-së, Këshillit të të Drejtave të Njeriut dhe Zyrës së Komisionerit të Lartë të OKB-së për të Drejtat e Njeriut të veprojnë urgjentisht për të ndaluar sulmet ndaj civilëve.
Ministria bëri thirrje për mbrojtjen e personave të zhvendosur, kampeve, kolonave të evakuimit dhe objekteve mjekësore si dhe për lirimin e personave të rrëmbyer dhe të ndaluar në mënyrë arbitrare dhe për dhënien e informacionit mbi fatin e personave të zhdukur.
Kontrolli territorial në Jemen ka ndryshuar ndjeshëm ditët e fundit ndërsa Huthit kanë njoftuar marrjen nën kontroll të disa distrikteve në bregdetin perëndimor si dhe të ishujve në Detin e Kuq, përfshirë ishullin Mayyun, i njohur edhe si ishulli Perim në Ngushticën Bab el-Mandab.
Forcat e qeverisë jemenase njoftuan përparime në provincën Al-Xheuf, pranë kufirit me Arabinë Saudite dhe thanë se po i afroheshin Al-Hazmit, kryeqendrës së provincës.
Përveç zmbrapsjes së një sulmi të madh në Marib, ato raportuan edhe sulme ajrore ndaj objektivave të Huthive në Mokha dhe përreth saj si dhe në zona të provincave Taiz, Lahij dhe Al-Dhale, duke thënë se automjete ushtarake dhe armë u shkatërruan.
Përleshjet mes forcave qeveritare dhe Huthive janë përshkallëzuar që nga fillimi i korrikut 2026, pas disa vitesh qetësie relative.
Jemeni është përfshirë nga lufta që kur Huthit morën nën kontroll kryeqytetin Sana dhe disa provinca në shtator 2014, përpara se një koalicion arab i udhëhequr nga Arabia Saudite të ndërhynte në mars 2015 në mbështetje të qeverisë së njohur ndërkombëtarisht.
