Ngricat e forta dhe reshjet e borës kanë prekur rajone të ndryshme të Rusisë, thanë të martën media shtetërore e vendit.
Ngricat e ashpra vazhduan në rajonin Khabarovsk të Lindjes së Largët të Rusisë dhe në Republikën Tuva, e vendosur në Siberinë e Rusisë. Sipas televizionit shtetëror rus, 16 fluturime të linjave ajrore lokale u vonuan, me më shumë se 300 njerëz në pritje për t’u nisur. Fluturimet u bllokuan më gjatë në Khabarovsk për shkak të një cikloni. Shkollat dhe kopshtet janë mbyllur.
Sipas meteorologëve, dita më e ftohtë pritet të jetë 17 dhjetori. Gjatë ditës temperatura mesatare pritet të zbresë në minus 20 deri në minus 25 gradë Celsius.
Në veri të Tuvës, pesë rajone kanë mbetur pa energji elektrike për shkak të rritjes së ngarkesës në rrjetin elektrik.
Në rajonin e Omsk, rrjetet e ngrohjes nuk mund t’i rezistonin ngricave dhe dritaret ishin të mbuluara me akull brenda apartamenteve.
Ndërkohë, Ministria e Emergjencës ruse lëshoi dy paralajmërime urgjente në rajonin Magadan, për shkak të reshjeve të borës dhe erërave të forta. /koha
