Pavarësisht se kush e gjuajti raketën që vrau dy persona në Poloninë lindore, është Rusia ajo që “mbart përgjegjësinë përfundimtare” për incidentin, akuzoi Sekretari amerikan i Mbrojtjes Lloyd Austin, raporton Anadolu Agency (AA).
Austin tha se “incidenti tragjik dhe shqetësues është një tjetër kujtues i pamaturisë së luftës së zgjedhur të Rusisë”.
“Ukraina ka të drejtën themelore për të mbrojtur veten dhe ne do të vazhdojmë të qëndrojmë në solidaritet me popullin e Ukrainës ndërsa ata mbrojnë vendin e tyre”, u tha ai gazetarëve në Pentagon së bashku me shefin e ushtrisë Mark Milley.
Raketa në fjalë ra të martën në mbrëmje në fshatin Przewodow, i cili shtrihet pranë kufirit me Ukrainën.
Incidenti shkaktoi frikën e një përshkallëzimi, por Sekretari i Përgjithshëm i NATO-s, Jens Stoltenberg, tha se analizat fillestare sugjerojnë se shpërthimi “me gjasë është shkaktuar nga një raketë e mbrojtjes ajrore ukrainase e lëshuar për të mbrojtur territorin ukrainas”.
Më herët të mërkuren, presidenti amerikan Joe Biden tha gjithashtu se nuk ka gjasa që raketa të jetë lëshuar nga Rusia, ndërsa sipas presidentit polak Andrzej Duda, ka shumë të ngjarë të jetë një raketë e mbrojtjes ajrore ukrainase.
Sulmi ndodhi teksa Ukraina përpiqej të shmangte një valë të paprecedentë sulmesh raketore ruse që synuan infrastrukturën energjetike e cila është jetike për popullatën civile të Ukrainës me afrimin e dimrit.
Ndërkohë, Milley, zyrtari më i lartë ushtarak amerikan, tha se Rusia lëshoi deri në 100 raketa të martën, duke e quajtur ofensivën si “me gjasë” breshëria më e madhe e sulmeve raketore që kur Kremlini filloi luftën e tij kundër Ukrainës në shkurt. Rreth një e katërta e popullsisë civile të Ukrainës është tani pa energji elektrike, tha ai.
Rusia “po imponon një fushatë terrori, një fushatë vuajtjeje maksimale, mbi popullatën civile ukrainase në mënyrë që të mposhtë moralin e ukrainasve”, tha Milley.
“Shënjestrimi i qëllimshëm i rrjetit të energjisë civile, duke shkaktuar dëme të tepërta kolaterale dhe vuajtje të panevojshme për popullatën civile, është krim lufte”, theksoi ai.
