“Më shumë raste do të thotë që mund të presim të shohim më shumë shtrime në spital dhe vdekje në javët e ardhshme”, tha Tedros Adhanom Ghebreyesus
Kreu i Organizatës Botërore të Shëndetësisë (OBSH) tha të mërkuren se rastet e koronavirusit janë dyfishuar në gjashtë javë dhe raportimet e lisë së majmunëve janë rritur në pothuajse 14.000 në 70 vende në vitin 2022, raporton Anadolu Agency (AA).
Tedros Adhanom Ghebreyesus tha se vdekjet nga koronavirusi po rriten gjithashtu, por për momentin, jo aq shpejt sa rastet.
“Më shumë raste do të thotë që mund të presim të shohim më shumë shtrime në spital dhe vdekje në javët e ardhshme”, tha ai në një vebinar mediatik.
Shefi i OBSH-së deklaroi se ka shumë nënlinja të variantit Omicron të koronavirusit, më së shumti BA.5, varianti më i transmetueshëm që është zbuluar.
“Ne do të shohim valë të vazhdueshme infeksioni, por nuk kemi nevojë të shohim valë të vazhdueshme shtrimi në spital dhe vdekje. Kemi mjetet për të shpëtuar jetë – vaksina, teste, terapeutikë dhe mjete të shëndetit publik”, tha Tedros.
Për sa i përket lisë së majmunëve, ai tha: “Deri më tani janë raportuar pesë vdekje, të gjitha në Afrikë”.
“Shumica e rasteve vazhdojnë të raportohen nga Evropa, kryesisht tek meshkujt që kryejnë marrëdhënie seksuale me meshkuj”, shtoi ai.
Tedros tha se Komiteti i Urgjencës së Rregulloreve Ndërkombëtare të Shëndetit do të mblidhet të enjten për të shqyrtuar nëse shpërthimi i lisë së majmunëve përbën një emergjencë të shëndetit publik me shqetësim ndërkombëtar – niveli më i lartë i urgjencës së OBSH-së.
Ai tha se megjithëse ka një tendencë në rënie për linë e majmunëve në disa vende, të tjerët po përballen me rritje dhe gjashtë vende kanë raportuar rastet e tyre të para javën e kaluar.
“Këtë javë, OBSH përditësoi udhëzimet e saj për burrat që kryejnë marrëdhënie seksuale me burra për të përfshirë këshilla dhe informacione shtesë për komunitetin e prekur”, tha Tedros.
