Shteti i vetëshpallur, i panjohur i Karabakut, do të pushojë së ekzistuari deri më 1 janar, transmeton Anadolu.
Ky zhvillim vjen pas një dekreti të nënshkruar nga kreu i këtij shteti të vetëshpallur, Samvel Shahramanyan.
Presidenti i Azerbajxhanit: Do të mbrohen të drejtat e armenëve që jetojnë në Karabak
Në dokumentin e publikuar nga mediat armene thuhet se popullsia armene e rajonit të Karabakut duhet të marrë parasysh kushtet e riintegrimit të propozuara nga Azerbajxhani dhe të vendosë në mënyrë të pavarur për mundësinë e qëndrimit.
Në dokument thuhet se për të shpërbërë përpara 1 janarit 2024 të gjitha institucionet dhe organizatat shtetërore nën varësinë e tij, republika e ashtuquajtur e Artsakh-ut pushon së ekzistuari.
“Pas hyrjes në fuqi të këtij dekreti, popullsia e Karabakut, duke përfshirë edhe ato që ndodhen jashtë republikës, duhet të shqyrtojë kushtet e riintegrimit të paraqitura nga Republika e Azerbajxhanit, në mënyrë që të marrë një vendim të pavarur dhe individual për mundësinë e qëndrimit, kthimit në Nagorno-Karabakh në të ardhmen”, thuhet në dekret.
Marrëdhëniet midis Azerbajxhanit dhe Armenisë kanë qenë të tensionuara që nga viti 1991, kur ushtria armene pushtoi Karabakun, një territor i njohur ndërkombëtarisht si pjesë e Azerbajxhanit.
Republika e ashtuquajtur u shpall në vitin 1991, por nuk u njoh nga asnjë shtet anëtar i OKB-së.
Në vjeshtën e vitit 2020, Azerbajxhani çliroi disa qytete, fshatra dhe vendbanime në Karabak nga pushtimi armen gjatë përleshjeve që zgjatën 44 ditë. Lufta përfundoi me një armëpushim të ndërmjetësuar nga Rusia.
Javën e kaluar, në vazhdën e provokimeve nga forcat armene në Karabak, Azerbajxhani nisi aktivitete “anti-terroriste” për të mbështetur paktin trepalësh të paqes. Pas 24 orësh, u arrit një armëpushim, ku Azerbajxhani shihej gjerësisht si fitues.
Presidenti i Azerbajxhanit, Ilham Aliyev, dhe kryeministri armen Nikol Pashinyan do të takohen më 5 tetor në qytetin spanjoll Granada për të diskutuar nënshkrimin e një traktati paqeje mes dy vendeve.
