Sekretarja e Brendshme në Britaninë e Madhe, Suella Braverman, u zotua se qeveria britanike do të zgjerojë rrugët e sigurta dhe të ligjshme për emigrantët pas tragjedisë në kanalin britanik, ku 4 emigrantë humbën jetën, kur varka e tyre u mbyt në orët e para të mëngjesit.
“Tragjedia e mëngjesit të sotëm, si humbja e 27 personave në një ditë nëntori të vitit të kaluar, është kujtuesi më i kthjellët i mundshëm se pse duhet t’i japim fund këtyre kalimeve”, tha Braverman.
Rreth 43 persona të tjerë që ishin në bord janë shpëtuar. Ende vazhdon kërkimi dhe pritet që numri i viktimave të shtohet.
Themeluesja e shoqatës bamirëse të refugjatëve në MB, Clare Moseley u shpreh për mediat se qeveria ‘britanike ka gjak në duart e saj.
“Nuk ka asnjë arsye pse refugjatët duhet të vdesin duke u përpjekur të kërkojnë azil në MB dhe është krejtësisht e turpshme që qeveria jonë refuzon të veprojë për t’i bërë refugjatët të ndihen të sigurt.”
Kombësia e emigrantëve që ndodheshin në varkë nuk dihet ende.
