Një palestinez është vrarë dhe 15 të tjerë janë plagosur të martën nga sulmet izraelite në zona të ndryshme të Rripit të Gazës, sipas burimeve mjekësore.
Në spitalin Al-Awda në kampin e refugjatëve Nuseirat, në Gazën qendrore, u dërguan trupi i një palestinezi të vrarë dhe 11 të plagosur, disa prej tyre në gjendje të rëndë. Ata u goditën nga një sulm me dron izraelit ndaj një tende ku strehoheshin persona të zhvendosur.
Në spitalin Nasser në Khan Younis, në jug të Gazës, u dërguan edhe dy të plagosur pas një sulmi me dron ndaj një shtëpie në jug të qytetit.
Ndërkohë, dy persona të tjerë u dërguan në spitalin Al-Shifa në qytetin e Gazës, pas një sulmi me dron që goditi çatinë e një shtëpie pranë varrezave Sheikh Radwan, në veriperëndim të qytetit.
Sipas të dhënave të autoriteteve shëndetësore palestineze, që nga 7 tetori 2023 në Gaza janë vrarë 73,662 palestinezë dhe janë plagosur 174,627 të tjerë. Rreth 90 për qind e infrastrukturës së territorit është shkatërruar.
Që nga hyrja në fuqi e marrëveshjes së armëpushimit më 11 tetor 2025, sipas të njëjtave burime, janë vrarë 1,355 palestinezë dhe janë plagosur 4,516 të tjerë, ndërsa janë nxjerrë nga rrënojat trupat e 827 personave.
Të paktën 10,000 persona rezultojnë ende të zhdukur dhe besohet se ndodhen nën rrënojat e shtëpive të tyre. Konflikti ka detyruar gjithashtu afro dy milionë palestinezë të zhvendosen nga zonat e ndryshme të Rripit të Gazës. /mesazhi
