Kryetarët e zgjedhur në dy komunat veriore, Zubin Potok dhe Zveçan pritet të betohen të enjten (25 maj) në orën 10:00.
Lajmin për Telegrafin e ka konfirmuar sekretari i Partisë Demokratike të Kosovës (PDK), Betim Gjoshi.
Ai tha se data është caktuar më 25 maj me kërkesë të MAPL-së.
“Me kërkesë të MAPL-së është caktuar data 25 maj për betimin e kryetarëve në tre komunat veriore në objektet publike të komunave”, tha Gjoshi.
Siç merr vesh Telegrafi betimi i kryetari i të Zveçanit, Ilir Peci do të bëhet në shkollën fillore “Isa Boletini”, në Boletin.
Ndryshe, Ilir Peci nga radhët e PDK-së pritet të betohet si kryetar i Zveçanit, ndërsa Izmir Zeqiri po nga radhët e PDK-së, pritet të betohet si kryetar i Zubin Potokut.
Reklama
E, sa i përket kryetarit nga radhët e Lëvizjes Vetëvendosje, Lulzim Hetemi ende nuk ka ndonjë informacion se kur pritet të jap betimin e tij.
Ndryshe, të premten e javës së kaluar, Erden Atiq është betuar si kryetar i Mitrovicës së Veriut.
Më 23 prill, në Mitrovicë të Veriut, Leposaviq, Zveçan dhe Zubin Potok u mbajtën zgjedhjet e jashtëzakonshme lokale.
Sipas KQZ-së, Lëvizja Vetëvendosje fitoi garën për kryetar komune në Mitrovicë të Veriut dhe Leposaviq, ndërsa Partia Demokratike e Kosovës fitoi në Zveçan dhe Zubin Potok.
Lista Serbe, partia më e madhe e serbëve në Kosovë nuk mori pjesë në zgjedhje dhe u bëri thirrje qytetarëve serbë që ta bojkotojnë procesin zgjedhor.
Komunat në veri mbetën pa kryetarë nga nëntori i vitit të kaluar, kur përfaqësuesit serbë në atë zonë dhanë dorëheqje nga vendet e tyre të punës, për shkak të mospajtimit me një vendim të Qeverisë së Kosovës për ri-regjistrimin e makinave me targa ilegale serbe.
