Më shumë se 17 milionë tonë drithë janë transportuar përmes korridorit të drithit të Detit të Zi që u formua me ndërmjetësimin e Turqisë vitin e kaluar në përpjekje për të shmangur një krizë të mundshme ushqimore në vazhdën e luftës Rusi-Ukrainë, njoftoi Ministria turke e Mbrojtjes, transmeton Anadolu Agency (AA).
“Dërgimi i drithit nga portet ukrainase vazhdon në mënyrë të sigurt siç ishte planifikuar”, tha ministria.
Deri më tani, të paktën 643 anije të ngarkuara me drithë janë larguar nga portet e Ukrainës, sipas deklaratës së ministrisë.
Korrikun e kaluar, Turqia, OKB-ja, Rusia dhe Ukraina nënshkruan një marrëveshje në Istanbul për të rifilluar eksportet e drithit nga tre porte ukrainase të Detit të Zi, të cilat u ndaluan pas fillimit të luftës Rusi-Ukrainë në shkurt 2022.
Një qendër e përbashkët koordinimi me zyrtarë nga të tre vendet dhe OKB-ja u krijua në Istanbul për të mbikëqyrur dërgesat.
Anija e parë që transportonte drithë u nis më 1 gusht 2022 nga porti ukrainas i Odesa-s sipas marrëveshjes historike.
Turqia, e vlerësuar ndërkombëtarisht për rolin e saj unik ndërmjetësues midis Ukrainës dhe Rusisë, i ka bërë vazhdimisht thirrje Kievit dhe Moskës që t’i japin fund luftës përmes negociatave.
