Njoftohet se shtatë palestinezë u plagosën nga ndërhyrja e forcave izraelite në demonstratat kundër vendbanimeve të paligjshme hebreje në Bregun Perëndimor të pushtuar dhe dhjetëra palestinezë u prekën nga gazi i hedhur, transmeton Anadolu Agency (AA).
Ushtarët izraelitë ndërhynë në demonstratat paqësore të organizuara nga palestinezët në vendbanimet Kefr Kaddum, Calkiya, Bayta të Nablusit dhe Al-Jib në lindje të Kudsit.
Në një deklaratë të bërë nga Gjysmëhëna e Kuqe Palestineze, thuhet se shtatë persona të plagosur nga plumbat e gomës dhe dhjetëra persona të prekur nga gazi i shkrepur kanë marrë ndihmë mjekësore në vendngjarje.
Një tjetër provokim nga deputeti izraelit Ben Gvir
Nga ana tjetër, dhjetëra kolonë hebrenj të udhëhequr nga deputeti izraelit i ekstremit të djathtë Itamar Ben Gvir brohoritën parulla anti-arabe me flamuj izraelitë dhe bastisën fshatin Nebi Samuel në Kudsin veriperëndimor.
Kolonët hodhën shishe qelqi dhe gurë mbi turmën që u mblodh për të falur namazin e xhumasë.
Ben Gvir, i njohur për udhëheqjen e bastisjeve provokuese që shpesh çonin në akte të dhunshme, u tha gazetarëve: “Erdha këtu për të shpjeguar se kush është i zoti i shtëpisë. Ne erdhëm këtu me flamuj izraelitë për t’u thënë atyre: Ne jemi të zotët e shtëpisë dhe shteti izraelit kurrë nuk gjunjëzohet”
Vendbanimet ilegale hebreje
Ka më shumë se 250 vendbanime të paligjshme kolone hebreje në Bregun Perëndimor, të cilin Izraeli e pushtoi në vitin 1967. Kolonët hebrenj që banojnë në këto vende e bëjnë jetën edhe më të vështirë për palestinezët që jetojnë nën okupim në Bregun Perëndimor.
Sipas ligjit ndërkombëtar, të gjitha vendbanimet kolone hebraike në territoret e pushtuara konsiderohen të paligjshme.
Palestinezët mbajnë demonstrata çdo të premte për të protestuar kundër ndërtimit të paligjshëm të vendbanimeve hebraike.
Forcat izraelite u përgjigjen protestuesve palestinezë me plumba të vërtetë dhe gome, si dhe me gaz lotsjellës. /aa
