Ushtria izraelite u bëri thirrje banorëve të disa lagjeve në qytetin Khan Yunis, që ndodhet në jug të Rripit të Gazës, të evakuojnë shtëpitë e tyre, transmeton Anadolu.
“Për herë të parë, ushtria u bëri thirrje banorëve të disa lagjeve në Khan Yunis, në jug të Rripit të Gazës, që të evakuojnë shtëpitë e tyre”, tha radioja e ushtrisë izraelite.
Izraeli gjithashtu lëshoi fletëpalosje për banorët në lindje të Khan Yunisit. “Për banorët e lagjeve lindore të Khan Yunisit, Al-Qarara, Khuza’a, Bani Suheila dhe Abasan, për sigurinë tuaj, duhet të evakuoni menjëherë shtëpitë tuaja dhe të shkoni në strehimoret e njohura”, thuhet në fletëpalosje.
Ushtria tha në fletëpalosjet e saj se “veprimet e Hamasit” e detyrojnë atë “të veprojë kundër tij në zonën tuaj të banimit”, pa dhënë detaje.
Radioja e ushtrisë komentoi se ky është një “hap i rëndësishëm që tregon një zgjerim të pritshëm” të operacioneve ushtarake izraelite drejt jugut të Rripit të Gazës.
Të hënën, zyra e qeverisë për media në Rripin e Gazës foli për raportimet se kishte trupa të qindra palestinezëve të zhvendosur në rrugët që Izraeli i kishte shpallur “të sigurta” drejt jugut të Rripit të Gazës.
“Marrim dhjetëra raportime dhe apele për praninë e qindra trupave të martirëve në rrugë në zona të ndryshme të qytetit të Gazës, të cilët u përpoqën të shkonin drejt kalimit të pretenduar të sigurt”, tha zyra në Telegram.
Kjo vjen pasi Avichay Adraee, zëdhënësi i ushtrisë izraelite, rinovoi paralajmërimin e tij për popullin e Gazës, duke u kërkuar atyre të lëvizin në jug “për sigurinë e tyre”.
