Presidentja e Komisionit Evropian, Ursula von der Leyen, i kërkoi BE-së të marrë “veprim të menjëhershëm” për migracionin, duke përfshirë përforcimin e infrastrukturës në kufirin tokësor midis Türkiye-s dhe Bullgarisë, transmeton Anadolu.
Duke folur në seancën plenare të Parlamentit Evropian, Ursula von der Leyen tha se “pa dyshim ka presione në rritje” në kufijtë e jashtëm të BE-së.
Ajo tha se Agjencia Evropiane e Rojës Kufitare dhe Bregdetare (FRONTEX) regjistroi 330.000 kalime të parregullta kufitare në vitin 2022, që është 64 për qind më shumë se një vit më parë dhe njëkohësisht shifra më e lartë që nga viti 2016.
Von der Leyen theksoi se “shumica e atyre që aplikojnë për azil nuk kanë nevojë për mbrojtje” ndërsa normat e kthimit mbeten të ulëta, rreth 22 për qind.
Për të bërë një “ndryshim të vërtetë në terren”, ajo tha se Komisioni Evropian do t’u propozojë udhëheqësve të BE-së “veprim të menjëhershëm” në katër fusha, në një samit të posaçëm për migracionin më 9-10 shkurt.
Sipas von der Leyen, “çështjet më urgjente tani janë në kufirin tokësor midis Bullgarisë dhe Türkiye-s” dhe aftësitë e menaxhimit të kufirit duhet të forcohen.
Sipas propozimit të Komisionit, BE-ja mund të sigurojë “infrastrukturë dhe pajisje, si dronë, radarë dhe mjete të tjera të mbikëqyrjes” dhe të rrisë praninë e FRONTEX-it.
Përveç kësaj, BE-ja duhet të trajtojë gjithashtu presionin në rritje në Mesdheun Qendror dhe të godasë rrjetet e kontrabandës.
Von der Leyen gjithashtu tha se BE duhet të sigurojë më shumë kthime me dinjitet dhe më të shpejta të atyre që u është refuzuar kërkesa për azil, si dhe “solidaritet dhe përgjegjësi” midis shteteve anëtare në menaxhimin e aplikimeve.
Përpos kësaj, ajo vlerësoi se BE-ja duhet të gjejë një “ekuilibër të drejtë” në bashkëpunim me vendet fqinje dhe vendet e origjinës.
“Partneritetet për talentet, politika e vizave, tregtia dhe investimet luajnë një rol të rëndësishëm këtu, si dhe mundësitë për rrugë të sigurta dhe ligjore si pjesë e qasjes sonë të përgjithshme gjithëpërfshirëse ndaj menaxhimit të migracionit”, tha von der Leyen.
