Presidenti i Serbisë, Aleksandar Vuçiq ka pritur sot në takim ministrin e Jashtëm të Spanjës, Jose Manuel Albares në Beograd, raporton Anadolu.
Vuçiq, i cili bëri një deklaratë në llogarinë e tij në rrjetet sociale pas takimit me Albares, i cili filloi turneun e tij në Ballkanin Perëndimor me Serbinë tha: “Kemi pasur një takim të mirë me miqtë që respektojnë Serbinë, hapur dhe të fokusuar në shkëmbimin e përvojave”.
Duke thënë se Spanja mbështet procesin e anëtarësimit të Serbisë në Bashkimin Evropian (BE), Vuçiq tha: “E falënderova edhe Spanjën që nuk e ka njohur pavarësinë e Kosovës si dhe për mbështetjen e Serbisë në forumet ndërkombëtare”.
Vuçiq tha se “është i shqetësuar për sulmet ndaj serbëve në veri të Kosovës” dhe ka theksuar se “prioritet është themelimi i Asociacionit të komunave me shumicë serbe, i cili do të ofrojë sigurinë e serbëve sa më shpejt të jetë e mundur”.
Pas Serbisë, Albares do të vazhdojë turneun ballkanik me Bosnjë e Hercegovinën (BeH).
– Marrëdhëniet Kosovë-Serbi
Kryeministri i Kosovës, Albin Kurti dhe presidenti serb Aleksandar Vuçiq ranë dakord për një marrëveshje që do të normalizonte marrëdhëniet mes dy vendeve në negociatat, të cilat zgjatën rreth 12 orë në Ohër të Maqedonisë së Veriut më 18 mars, nën ndërmjetësimin e BE-së.
Marrëveshja prej 11 pikash që do të normalizojë marrëdhëniet ndërmjet Kosovës dhe Serbisë, e cila u njoftua në opinion, nuk e detyron Serbinë të njohë pavarësinë e Kosovës, por kërkon që të dyja vendet të njohin dokumentet dhe simbolet zyrtare të njëra-tjetrës, përfshirë pasaportat, diplomat dhe targat. Nga Kosova kërkohet themelimi i “Asociacionit të komunave me shumicë serbe” që do të ketë të drejta të vetëmenaxhimit në vendbanimet ku jetojnë kryesisht serbët.
Edhe pse Kosova njihet si shtet i pavarur nga 117 shtete, ajo përshkruhet si një nga “zonat e ngrira të konfliktit në Evropë” për shkak të tensioneve të vazhdueshme etnike në veri të saj dhe pamundësisë së saj për t’u bërë anëtare e Kombeve të Bashkuara (OKB).
