Në vitin 1992, imami i xhamisë së fshatit Burojë, Avdyl Krasniqi, së bashku me Hashim Thaçin e Kadri Veselin, fshehën një sasi të konsiderueshme të armatimit në xhaminë e fshatit Burojë të Skenderajt, armatim ky që më pas do t’i jepej ushtarëve të UÇK-së. Rëndësia dhe roli i kësaj xhamie në aspektin fetar e kombëtar, u kujtua sot në 300-vjetorin e themelimit të saj.
Tentimi i parë ishte i pasuksesshëm. E për hapjen e kësaj dere tani duhej gjetur një alternativë. Por, dyert e xhamisë së vjetër të fshatit Burojë, dekada më parë ishin shumë më të sigurta.
Në vitet e 90-ta, ajo ishte vazhdimisht nën mbikëqyrjen e Ushtrisë Çlirimtare të Kosovës.
Kjo pasi në vitin 1992, imami i kësaj xhamie, Avdyl Krasniqi, së bashku me Hashim Thaçin e Kadri Veselin, brenda saj fshehën një sasi të madhe armatimi.
E që më vonë do të përdorej nga UÇK-ja.
“Kjo është pjesa ku janë vendosur arkivolet, janë heq dërrasat, edhe janë vendos arkivolet me armë. Këtë nuk e kanë ditur 4-5 veta, edhe janë ndërruar 2 me 2 që çdo natë me bo roje deri në vitin 1997” tregoi imam i xhamisë në fshatin Burojë, Fadil Idrizi.
Por, cila ishte sasia e armatimit që krerët e UÇK-së, që tani ndodhën për gjykim në Hagë, e fshehën për 5 vjet në këtë xhami.
Këtë për Tëvë1, e ka treguar imami i ri i kësaj xhamie, Fadil Idrizi.
“47 kallashnikovë, 5 armë M48, bomba dore, dylbi dhe 3 palë radio lidhje”, tha ai.
Ndërkohë në hyrje të kësaj xhamie, të enjten valoi përsëri flamuri i UÇK-së.
E oborri i saj, u mbush edhe një herë me qindra xhematlinjë.
Krejt kjo për ta shënuar 300 – vjetorin e ndërtimit të xhamisë së parë të fshatin Burojë.
Në këtë tubim, u tha se kjo xhami e ndërtuar në vitin 1722, shërbeu edhe si vend ku u mësua shkrim-leximi i gjuhës shqipe.
Por, të pranishmit i entuziazmoi edhe përmendja e një emri të njohur nga Buroja, Hashim Thaçit.
E ishte pikërisht Haxhi Thaçi, babai i ish-presidentit, Hashim Thaçi, që në këtë përvjetor jubilar të ndërtimit të xhamisë, shtroi drekë për qindra persona.
Në pritje të rinovimit të kësaj xhamie, banorët e këtij fshati, e shfrytëzojnë xhaminë e re për kryerjen e adhurimeve ndaj Zotit.
Kronika e gazetarit Fidan Zejnullahu /teve1
