Vdekja e 20-vjeçarit Omid Sharlak ka shkaktuar zemërim dhe reagime të forta në Iran disa orë pas videos në të cilën ai dukej duke i vënë flakën një posteri me fytyrën e udhëheqësit suprem fetar të vendit, Ali Khamenei.
Edhe pse policia iraniane e ka shpallur atë një “vetëvrasje”, aktivistët dhe të afërmit e 20-vjeçarit pretendojnë se ai ishte viktimë e autoriteteve iraniane.
20-vjeçari u gjet i vdekur në makinën e tij në Iranin perëndimor me një plagë arme zjarri në kokë dhe shenja baruti në duar.
Dyshimet rreth rrethanave të vdekjes së Sharlak u shtuan pasi u shfaq një video që tregonte të atin duke thënë në vendin e vdekjes së të birit: “Ata vranë heroin tim këtu“, ndërsa një zë jashtë ekranit mund të dëgjohet duke thënë: “Ata e rrethuan dhe e qëlluan”.
Megjithatë, më vonë, në një intervistë televizive të transmetuar nga media shtetërore, babai i Sharlak u kërkoi njerëzve të “mos i kushtojnë vëmendje asaj që qarkullon në mediat sociale dhe t’i lënë autoritetet gjyqësore të merren me çështjen”, me aktivistët që ankoheshin se kjo video ishte e sajuar pasi familja ishte nën mbikëqyrje.
Në funeralin e Sharlak të hënën e kaluar, u brohoritën thirrje të tilla si “Vdekje diktatorit” dhe “Vdekje Khamenei”.
Në videon e ndarë nga Sharlak në Instagram disa orë para vdekjes së tij, mund të dëgjohet zëri i ish-Shahut të Iranit, Mohammad Reza Pahlavi, i cili u largua nga Irani në vitin 1979 dhe ku qeveria revolucionare mori pushtetin po atë vit.
Sharlak ishte një student aviacioni dhe boksier amator, si dhe tifoz i mundësit iranian Ebrahim Essaghi. Essaghi i tha gazetës Guardian se Sharlak e kontaktoi atë nëpërmjet Instagram-it pak para se të vdiste. “Ai më dërgoi një mesazh se jeta e tij ishte në rrezik dhe se nëse i ndodhte diçka, ne duhet të bëheshim zëri i tij.”
Essaghi, i cili jeton në Gjermani, tha se pas vdekjes së tij, disa nga miqtë e ngushtë të Sharlak thanë se besonin se ai ishte vrarë nga shërbimet sekrete.
