Robert Ivers shkroi librin “Si të vrasësh një gjyqtar” dhe u dërgoi kopje disa gjyqtarëve
Një 73-vjeçar nga Minesota është shpallur fajtor nga një gjykatë federale amerikane, pasi shkroi dhe shpërndau një dorëshkrim prej 236 faqesh me titullin “How to Kill a Federal Judge” (Si të vrasësh një gjyqtar federal), i cili përmbante kërcënime ndaj anëtarëve të gjyqësorit federal.
Juria federale në St. Paul e shpalli Robert Phillip Ivers fajtor për të tre akuzat ndaj tij, përfshirë dërgimin e komunikimeve kërcënuese dhe kërcënimin për vrasjen e një gjyqtari federal.
Ivers ishte dënuar edhe më parë, në vitin 2019, për kërcënime ndaj një gjyqtari federal. Ai u arrestua në shtator 2025, në një periudhë kur autoritetet amerikane raportuan rritje të kërcënimeve ndaj gjyqtarëve.
Sipas Shërbimit të Marshallëve të SHBA-së, gjatë vitit fiskal në vazhdim janë regjistruar kërcënime ndaj 299 gjyqtarëve të ndryshëm federalë.
Hetimi ndaj Ivers nisi pasi punonjës të një biblioteke në Wayzata, Minesota, njoftuan autoritetet se e kishin parë duke printuar kopje të dorëshkrimit, të cilin ua kishte treguar edhe atyre.
Prokurorët thanë se Ivers u kishte dhënë punonjësve një fletëpalosje prej tri faqesh, ku libri paraqitej si një udhëzues për ekstremistët, i hartuar për t’i mësuar ata se si të planifikonin dhe realizonin sulme kundër gjyqtarëve, familjarëve të tyre, politikanëve dhe personave të tjerë.
Gjatë kontrollit të makinës së tij, autoritetet gjetën 20 kopje të lidhura me spirale të dorëshkrimit. Prokuroria e përshkroi dokumentin si një “manifest”, ku përfshiheshin emrat e disa personave dhe gjyqtarëve.
Mes tyre ishte edhe gjyqtari federal Robert Pratt nga Iowa, i cili para vdekjes së tij në janar kishte drejtuar një proces të vitit 2019 kundër Ivers.
Në atë gjyq, Ivers ishte shpallur fajtor për kërcënimin për vrasjen e gjyqtares federale Wilhelmina Wright. Pratt e kishte dënuar me 18 muaj burg.
Sipas aktakuzës, Ivers kishte kërcënuar jo vetëm Pratt, por edhe një avokat që kishte dëshmuar se e kishte dëgjuar atë duke kërcënuar Wright. Një kopje e dorëshkrimit iu dërgua edhe zyrës ligjore të këtij avokati.
Prokurorët thanë gjithashtu se Ivers u kishte deklaruar autoriteteve se kishte dërguar kopje të dorëshkrimit te dy gjyqtarët dhe te të nëntë anëtarët e Gjykatës Supreme të SHBA-së.
Fillimisht, Ivers u akuzua edhe për kërcënimin ndaj një gjyqtari të Gjykatës Supreme. Kjo akuzë u tërhoq më vonë, pasi mbrojtja kundërshtoi teorinë e prokurorisë mbi identitetin e gjyqtarit që pretendohej se ishte kërcënuar.
Rasti i Ivers vjen në një kohë kur autoritetet amerikane po përballen me shqetësime në rritje për sigurinë e gjyqtarëve federalë dhe presionet apo kërcënimet ndaj sistemit të drejtësisë. tesheshi
