Policia e Kosovës ka arrestuar të martën dy persona në Prishtinë, nën dyshimin se pranonin para nga kandidatët për patentë shoferi dhe se përmes pajisjeve për komunikim në largësi ua mundësonin kalimin e provimeve.
Sipas njoftimit, gjatë kontrollit në një autoshkollë në kryeqytet nën dyshimin se pronari i saj në këmbim të parave ua kryen provimet teorike dhe praktike për patentë shofer kandidatëve të interesuar ka arrestuar I.M., dhe B.M.,.
“Me datën 14.02.2023 pas hetimeve intensive disamujore të zhvilluara nga hetues të krimeve ekonomike, është realizuar një urdhëresë e gjykatës, me ç’rast është kontrolluar një autoshkollë në Prishtinë, nën dyshimin e bazuar se pronari i saj në këmbim të parave ua kryen provimet teorike dhe praktike për patentë shofer kandidatëve të interesuar. Personat e arrestuar lidhur me këtë rast janë: I.M mashkull/kosovar dhe B.M mashkull kosovar”, thuhet në njoftim.
Gjatë kontrollit të realizuar janë gjetur dhe janë sekuestruar si prova materiale: pesë folderë me kopje të testeve që dyshohet se janë të njëjta me teste për patentë shofer, një folder me të dhënat e kandidatëve si dhe dy pajisje që janë përdorur nga të dyshuarit për komunikim në largësi.
Dy të dyshuarit janë ndaluar në mbajtje për 48 orë.
