Autoritetet algjeriane kanë nxjerrë të shtunën trupin e pajetë të një 10-vjeçari, pas katër ditësh përpjekjesh për ta shpëtuar nga një pus në provincën El Bayadh, në perëndim të vendit.
Shërbimi i Mbrojtjes Civile njoftoi se trupi i djalit, Ayoub, u gjet pas një operacioni të gjatë shpëtimi, në të cilin morën pjesë ekipet e emergjencës dhe autoritetet lokale.
Ayoub kishte rënë në pusin e thatë të mërkurën, në fshatin Rekna, pjesë e komunës Ghassoul. Pusi ishte i ngushtë dhe i thellë, duke e bërë të pamundur ndërhyrjen e drejtpërdrejtë.
Ekipet e shpëtimit hapën një tunel paralel dhe, pasi përfunduan gërmimin gjatë natës mes së premtes dhe së shtunës, një pjesëtar i Mbrojtjes Civile zbriti për të hapur një tunel horizontal drejt vendit ku ndodhej fëmija.
Operacioni u përball me vështirësi të shumta për shkak të terrenit dhe rrezikut të shembjes së dheut.
Pas katër ditësh përpjekjesh intensive, autoritetet konfirmuan se Ayoub nuk mundi të shpëtohej. /mesazhi
