Policia izraelite arrestoi predikuesin e Xhamisë Al-Aksa, Sheikh Ekrima Sabri, për shkak të lutjeve për shefin e vrarë të Hamasit, Ismail Haniyeh, raporton Anadolu.
Haniyeh u vra të mërkurën në Teheran, kryeqyteti i Iranit. Teksa Hamasi dhe Irani fajësuan Izraelin për vrasjen, Tel Avivi nuk e ka konfirmuar apo mohuar përgjegjësinë për vrasjen.
Një nga të afërmit e Sheikh Sabrit tha për Anadolu se oficerët e policisë izraelite hynë në shtëpinë e tij në Kudsin Lindor të pushtuar dhe e arrestuan atë.
Pas namazit të xhumasë në Xhaminë Al-Aksa, Sabri udhëhoqi namazin e xhenazes në mungesë për kreun e vrarë të Hamasit.
“Populli i Kudsit dhe rrethinat e Kudsit nga minberi i xhamisë së bekuar Al-Aksa shprehin keqardhje për dëshmorin Ismail Haniyeh”, tha ai gjatë predikimit.
Pas predikimit, policia izraelite tha se po hetonte nëse deklarata përbënte “nxitje” dhe se ata do të vepronin në përputhje me rrethanat.
Predikuesi 85-vjeçar u arrestua disa herë nga forcat izraelite në të kaluarën dhe iu ndalua hyrja në Xhaminë Al-Aksa në Kudsin Lindor të pushtuar për disa muaj.
Sheikh Sabri është një kritik i vendosur i pushtimit izraelit prej dekadash të territoreve palestineze. Ai kishte mbajtur më parë postin e myftiut të Kudsit dhe territoreve palestineze nga viti 1994 deri në vitin 2006.
Siyonistler, Cuma hutbesinde şehit İsmail Heniyye’ye dua eden Mescid-i Aksa imamı 85 yaşındaki Şeyh İkrime Sabri’yi gözaltına aldı.. pic.twitter.com/cDEC44g2mY
— Tevfik (@tevfik_hams) August 2, 2024
