Të premten do të mbahet seanca e jashtëzakonshme e Kuvendit të Malit të Zi, ku do të diskutohet propozimi për shpërbërjen e Kuvendit, raporton Anadolu Agency (AA).
Seanca u caktua nga kryetarja e Kuvendit Danijela Gjuroviç me propozim të presidentit malazez Milo Gjukanoviç.
Gjukanoviç, në shpjegimin e propozimit, deklaroi se nuk janë plotësuar kushtet për t’i besuar mandatin për përbërjen e Qeverisë liderit të Demos-it, Miodrag Lekiç.
Sipas tij, procesi konsultativ ka treguar qartë se nuk ka arsye që brenda afatit të paraparë me Kushtetutë të emërohet një mandatar, i cili do të siguronte mbështetje në Kuvend për përbërjen e Qeverisë së 44-të të Malit të Zi.
Seanca e Kuvendit të Malit të Zi pritet të fillojë të premten në orën 12:00.