Ndërtesa e Qeverisë së Kosovës sonte u ndriçua me flamurin e Turqisë.
Derisa sot kryeministri Albin Kurti, në mbledhje të Qeverisë tha se ndërtesa e Qeverisë së Kosovës do të marrë ngjyrat e flamurit turk në shenjë nderimi për të gjitha viktimat që humbën jetën nga tërmeti.
Përmes një njoftimi, Qeveria ka shkruar se luten për shëndetin e të lënduarve dhe i qëndrojnë pranë popullit dhe shtetit turk.
“Dita e sotme në Kosovë është ditë zie shtetërore. Në nder të viktimave të tërmetit shkatërrues, ndërtesa e Qeverisë sonte u ndriçua me flamurin e Turqisë. Lutemi për shëndetin e të lënduarve dhe i qëndrojmë pranë popullit dhe shtetit turk”, thuhet në postimin e Qeverisë në Facebook.