Numri i të vdekurve nga tërmeti vdekjeprurës në Marok është rritur në 2.497, njoftoi Ministria e Brendshme e vendit, transmeton Anadolu.
Në një deklaratë, ministria tha se 2.476 persona të tjerë janë lënduar në tërmetin me magnitudë 7 ballë që goditi vendin e Afrikës Veriore të premten vonë.
Shërbimi Gjeologjik i Shteteve të Bashkuara (USGS) tha se epiqendra e tërmetit, i cili ndodhi pak pas orës 23:00 me kohën lokale, ishte 75 kilometra në juglindje të Marrakeshit, në një thellësi prej 18,5 kilometrash.
Dëme masive u raportuan në Marrakesh, vend i Trashëgimisë Botërore të UNESCO-s, nga tërmeti vdekjeprurës.
Ekipet e shpëtimit vazhduan sot kërkimin për personat e zhdukur të bllokuar nën rrënoja për të katërtën ditë pas tërmetit shkatërrues.
Një numër njerëzish janë nxjerrë nga ekipet e shpëtimit nga rrënojat e ndërtesave të shembura në zona të ndryshme të goditura nga tërmeti, njofton reporteri i Anadolu.
Disa ekipe të huaja të shpëtimit kanë mbërritur tashmë në vend për të ndihmuar në përpjekjet e shpëtimit për të mbijetuarit.
Maroku deri më tani ka pranuar oferta ndihme nga Spanja, Britania, Katari dhe Emiratet e Bashkuara Arabe.
Të dielën, qeveria marokene hapi një llogari të veçantë me thesarin dhe Bankën e Marokut për të pranuar donacione për viktimat e tërmetit.
Tërmeti ishte më i forti që goditi vendin e Afrikës së Veriut në njëqind vjet, sipas Institutit Kombëtar Gjeofizik të Marokut.
