Presidenti iranian, Masoud Pezeshkian, ka deklaruar se mbrojtja e vendosur e forcave të armatosura iraniane, e mbështetur nga populli dhe e koordinuar në të gjithë vendin, ka prishur llogaritjet e kundërshtarëve.
Sipas mediave iraniane, Pezeshkian tha se Irani nuk e nisi luftën, ndërsa kundërshtarët kishin llogaritur se vazhdimi i sulmeve do të krijonte kushtet për dobësimin dhe rrëzimin e Republikës Islamike.
Duke folur për sulmet ndaj Iranit, ai akuzoi SHBA-në se ka përdorur baza ushtarake në vendet e rajonit për të goditur objektiva iraniane. Ai përmendi edhe sulmin ndaj një shkolle në Minab, duke thënë se sulmi ishte kryer nga territoret e vendeve fqinje dhe myslimane.
Pezeshkian theksoi se Irani nuk synon të sulmojë këto vende, por do të godasë objektet dhe bazat prej të cilave nisen sulmet ndaj tij.
Presidenti iranian kundërshtoi gjithashtu praninë e bazave amerikane në rajon dhe deklaroi se Irani nuk e konsideron veten të nënshtruar ndaj asnjë fuqie të huaj.
“Ne nuk kemi ndërmend të kërcënojmë apo të dominojmë asnjë vend, por as nuk do t’i nënshtrohemi forcës”, tha Pezeshkian.
Ai vlerësoi lart forcat e armatosura iraniane për atë që e cilësoi si trimëri dhe sakrifica të mëdha, duke theksuar se mbështetja e popullit iranian ka qenë vendimtare. /mesazhi
