Qeveria e Italisë ka planifikuar të luftojë thatësirën dhe mungesën e ujit me masa konkrete, sipas një dekreti të miratuar dje në mbrëmje.
Planet e kabinetit të kryeministres, Giorgia Meloni përfshijnë emërimin e një komisioneri me përgjegjësi të mëdha, si dhe ngritjen e një komiteti për të monitoruar procesin.
Në planin afatgjatë, masat synojnë të rrisin vëllimin e rezervuarëve që mund të përdoren dhe të zgjerojnë basenet e depozitimit të ujërave të shiut për qëllime bujqësore.
Përdorimi i ujërave të zeza, gjithashtu duhet të rritet dhe qeveria po kërkon të promovojë zgjerimin e impianteve të shkripëzimit.
“Komiteti ka për qëllim të gjurmojë ecurinë e masave, të cilat konsiderohen të nevojshme për të trajtuar krizën e ujit në Itali”, sipas dekretit.
Verën e kaluar, kryesisht rajonet veriore të vendit u prekën nga thatësira e madhe, duke shkaktuar dëme të mëdha, përfshirë sektorin e bujqësisë.
Në disa rajone u shpall një emergjencë thatësire dhe u morën masa për menaxhimin e ujërave.
Dyshohet se situata mund të përkeqësohet këtë vit, pasi Italia ka raportuar tashmë probleme me mungesën e ujit. /atsh
