Spanja publikoi sot një dekret gjithëpërfshirës për strehimin, duke vendosur mbrojtje të reja për qiramarrësit dhe kufizime për investitorët e pronave ndërsa protestat për strehimin vazhduan në Madrid dhe Malaga dhe partitë politike u përgatitën për një votim vendimtar parlamentar të premten, transmeton Anadolu.
Dekreti, i publikuar në “Gazetën Zyrtare” të shtetit të Spanjës, do të hyjë në fuqi të enjten dhe përfshin 20 nene që përcaktojnë masa për dëbimet, qiratë, taksat dhe strehimin e përballueshëm.
Ndër dispozitat më të rëndësishme është një masë që synon të ashtuquajturat “fonde grabitqare”. Dekreti kufizon kompanitë dhe subjektet e tjera, aktiviteti i të cilave përfshin blerjen e pasurive të paluajtshme, që të blejnë banesa për më pak se 70 për qind të vlerës së tyre të vlerësuar në treg deri në fund të vitit 2028, me përjashtime që përfshijnë strehimin social dhe atë të përballueshëm.
Dekreti parashikon gjithashtu pezullimin deri në vitin 2030 të disa dëbimeve që përfshijnë persona vulnerabël pa strehim alternativ si dhe vendos rregulla më të rrepta për qiratë e përkohshme dhe qiratë e dhomave.
Kontratat e qirasë së përkohshme do të kërkojnë një arsye të vërtetë dhe të dokumentueshme për karakterin e tyre të përkohshëm ndërsa kontratat e përsëritura ose të pajustifikueshme për periudha të gjata mund të trajtohen si kontrata të zakonshme qiraje për banim. Për qiratë e dhomave, shuma e kombinuar e qirave të kërkuara për dhomat individuale nuk mund të tejkalojë shumën që mund të kërkohej për dhënien me qira të të gjithë pronës.
Rritjet e qirave do t’u nënshtrohen kufizimeve shtesë deri në fund të vitit 2027. Kur qiraja është tashmë mbi kufirin e zbatueshëm të çmimit referencë, nuk do të lejohet asnjë rritje ndërsa në raste të tjera rritjet nuk mund të kalojnë 2 për qind pa një marrëveshje të re mes pronarit dhe qiramarrësit.
Një dekret i dytë, që pritet të publikohet të enjten, përmban masë të veçantë që parashikon rinovimin automatik të kontratave të qirasë.
Sipas “El Pais”, pronarët që vendosin të mos rinovojnë një kontratë qiraje pas përfundimit të periudhës së detyrueshme të qirasë, në përgjithësi do të detyrohen t’u paguajnë qiramarrësve kompensim prej të paktën 12 muajsh qira, me përjashtime që përfshijnë rastet kur pronari ka nevojë për banesën për vete ose për disa anëtarë të familjes.
Të dyja dekretet do t’i nënshtrohen një votimi të jashtëzakonshëm për ratifikim në parlament të premten.
Masat vijnë pas disa ditësh protestash për strehimin. Protestuesit kaluan natën e katërt të kampuar në Puerta del Sol në qendër të Madridit, ku protesta u zgjerua pas dëbimit të Maricarmen Abascal, 87 vjeçe, e cila kishte jetuar në banesën e saj për më shumë se 70 vjet.
Një kamp paralel vazhdoi të mërkurën në Plaza de la Constitucion në Malaga, ku rreth 50 persona në afërsisht 25 tenda kaluan natën. Organizatorët po përgatisin gjithashtu një protestë për strehimin në qytetin jugor të shtunën.
Qeveria ende përballet me pasiguri nëse parlamenti do t’i ratifikojë dekretet të premten. Një dekret i ngjashëm për strehimin u hodh poshtë nga ligjvënësit në prill, kur Kongresi votoi 177 me 166 kundër miratimit të tij.
