Presidenti i Shteteve të Bashkuara, Donald Trump, ka njoftuar se ka nënshkruar një ligj që urdhëron publikimin e dokumenteve të lidhura me kriminelin seksual të ndjerë Jeffrey Epstein.
Trump e bëri njoftimin në rrjetet sociale të mërkurën mbrëma, pas presioneve disa mujore për të zbuluar plotësisht shtrirjen e krimeve të Epstein dhe lidhjet e tij me figura të fuqishme nga politika, biznesi dhe bota e argëtimit.
Ligji “Epstein Files Transparency Act”, i miratuar gjerësisht nga të dyja partitë në Kongres, detyron Departamentin e Drejtësisë të publikojë brenda 30 ditësh të gjitha materialet e deklasifikuara për Epstein në një format të kërkueshëm dhe të shkarkueshëm. Megjithatë, autoritetet mund të mbajnë të fshehura materiale të shfrytëzimit seksual të fëmijëve, të dhënat e viktimave dhe çdo informacion që lidhet me hetime aktive ose çështje të mbrojtjes kombëtare.
Teksti thekson se asnjë dokument nuk mund të mbahet i fshehtë për shkak të “turpit, dëmtimit të reputacionit ose ndjeshmërisë politike”, pavarësisht se përfshin zyrtarë të lartë apo figura të njohura ndërkombëtare.
Megjithëse mijëra dokumente janë publikuar tashmë, një gjyqtar amerikan ka thënë se arkiva e plotë përmban rreth 100 mijë faqe.
Epstein, i cili vdiq në qelinë e tij në Nju Jork në vitin 2019 ndërsa përballej me akuza për trafikim seksual, ka qenë për vite simbol i mistereve, dyshimeve dhe teorive të konspiracionit.
Në njoftimin e tij, Trump e quajti Epstein një “demokrat gjatë gjithë jetës” dhe vuri theksin te lidhjet e financuesit me figura të Partisë Demokratike, si ish-presidenti Bill Clinton dhe ish-sekretari i Thesarit Lawrence Summers. Asnjëri prej tyre nuk është akuzuar për vepra të paligjshme.
Trump vetë ka pasur njohje me Epsteinin gjatë viteve 1990 dhe 2000. Emri i tij është përmendur në emailet e publikuara së fundmi nga ligjvënës amerikanë, përfshirë një email të vitit 2011 ku Epstein i shkruante Ghislaine Maxwell se Trump kishte kaluar “orë të tëra” në shtëpinë e tij me një viktimë të trafikut seksual. Trump i ka mohuar kategorikisht këto pretendime.
Pas njoftimit të presidentit, kritikët shprehën dyshime se administrata do të respektojë transparencën e premtuar. Senatori Adam Schiff tha se nuk ishte “aspak i sigurt” se ligji do të zbatohej siç është shkruar, duke paralajmëruar për “zvarritje dhe mbulim” nga administrata e Trump.
Schiff shtoi se mënyra si po trajtohet çështja e Epstein do të mbetet një “shembull se si nuk duhet menaxhuar një krizë”. /mesazhi
