Shpërthimi i Ebolës në lindje të Republikën Demokratike të Kongos po përhapet me shpejtësi të paparë ndonjëherë, tha virologu i njohur kongolez Jean-Jacques Muyembe, transmeton Anadolu.
Shpërthimi, i njohur zyrtarisht nga autoritetet kongoleze më 15 maj, ka shkaktuar 1.916 vdekje midis 4.209 rasteve të konfirmuara deri më 7 gusht, raportoi sot e përditshmja franceze “Le Monde”.
Numri i të vdekurve po i afrohet atij të epidemisë së Ebolës të vitit 2018, e cila zgjati 22 muaj dhe mori 2.287 jetë, duke e bërë atë shpërthimin më vdekjeprurës të regjistruar deri më sot në RD të Kongos.
Muyembe, i cili bashkë-zbuloi virusin Ebola në vitin 1976 dhe mbetet drejtor i Institutit Kombëtar për Kërkime Biomjekësore në Kinshasa, tha se virusi ka të ngjarë të ketë qarkulluar që në janar, por nuk është zbuluar deri në prill ose maj.
“Kjo është një shpejtësi e jashtëzakonshme përhapjeje, të cilën nuk e kemi vërejtur kurrë më parë”, tha ai për “Le Monde”. Ai tha se reagimi ka qenë “i ngadaltë dhe joefektiv”, duke përmendur dobësitë në mbikëqyrje, problemet e koordinimit dhe ndikimin e konfliktit të armatosur dhe aktivitetit të minierave në rajonet lindore me popullsi të dendur.
Muyembe tha se shifrat zyrtare mund ta nënvlerësojnë ndjeshëm shkallën e vërtetë të shpërthimit sepse disa pacientë mbeten në shtëpi dhe nuk zbulohen. Shpërthimi është zgjeruar nga tre zona shëndetësore në 53 dhe nga tre provinca në pesë në një periudhë të shkurtër, shtoi ai.
Shpërthimi është shkaktuar nga lloji Bundibugyo, për të cilin aktualisht nuk ka vaksinë ose trajtim të miratuar. Testet klinike që testojnë antitrupat dhe qasjet antivirale janë duke u zhvilluar në Bunia dhe Mongbwalu.
Ekspertët e Organizatës Botërore të Shëndetësisë (OBSH) të premten rekomanduan përparësimin e vaksinës së licencuar kundër Ebolës Ervebo për vlerësim në një provë klinike të rastësishme mes shpërthimit.
OBSH-ja tha se Grupi i saj Këshillimor Teknik për përparësimin e vaksinës kandidate bëri rekomandimin pasi shqyrtoi të dhënat e reja paraprake që tregojnë se Ervebo ofroi “nivel të caktuar mbrojtjeje të kryqëzuar” kundër sëmundjes së virusit Bundibugyo në studimet në kafshë, veçanërisht kundër vdekjes.
Ervebo është e vetmja vaksinë e licencuar kundër Ebolës, por është miratuar kundër sëmundjes së virusit Ebola të shkaktuar nga virusi ebolavirusi Zaire dhe jo kundër virusit Bundibugyo.
